Y Genhedlaeth Nesaf o Arweinwyr Heddiw yn Bwrw Iddi Gyda’u Gwaith Ledled Gogledd Cymru

Bellach mae cenhedlaeth newydd o lysgenhadon gwrth-hiliaeth wedi cychwyn ar eu taith Arweinwyr Heddiw, gyda disgyblion o bob cwr o Ogledd Cymru yn dod ynghyd i ddechrau cynllunio sut y gallan nhw fynd ati i herio hiliaeth yn eu hysgolion.

Ar ddydd Mawrth, Medi’r 22ain, ymunodd 26 o lysgenhadon disgyblion newydd o 5 ysgol â Dangos y Cerdyn Coch i Hiliaeth yn Xplore! ar gyfer lansiad rhaglen Arweinwyr Heddiw 2026-27. Mae’r llysgenhadon newydd yn cynrychioli Ysgol Uwchradd Gatholig ac Anglicanaidd Sant Joseff ac Ysgol Uwchradd Darland yn Wrecsam; Ysgol Uwchradd Dinbych ac Ysgol Glan Clwyd yn Sir Ddinbych; ac Ysgol Dyffryn Conwy. Ariannwyd y rhaglen gyda chyllid gan Ysgolion Iach, Cyngor Bwrdeistref Sirol Conwy, Cyngor Sir Ddinbych a Chydlyniant Cymunedol Gogledd Ddwyrain Cymru.

At hyn, bu i’r lansiad ddwyn ynghyd 10 aelod o staff arwain newydd, yn ogystal â phartneriaid o gynghorau Sir Ddinbych, Wrecsam a Chonwy. Bydd y staff arwain yn cefnogi eu disgyblion sy’n llysgenhadon drwy gydol y rhaglen wrth iddyn nhw ddatblygu eu syniadau a mynd rhagddi gyda’u gwaith gwrth-hiliaeth yn eu hysgolion.

Ar y cyd â’r llysgenhadon newydd, ymunodd 7 o Arweinwyr Heddiw o Ysgol Uwchradd Gatholig Crist y Gair ac Ysgol Uwchradd Elfed â’r diwrnod i rannu eu profiadau a chynnig anogaeth i’r garfan newydd.

Gan glywed o lygaid y ffynnon gan ddisgyblion sydd eisoes wedi bod yn rhan o Arweinwyr Heddiw, roedd yn gyfle i’r llysgenhadon newydd weld sut mae gwaith gwrth-hiliaeth dan arweiniad disgyblion yn ymddangos yn ymarferol. Rhannodd y llysgenhadon presennol eu profiadau o arwain gwaith gwrth-hiliaeth yn eu hysgolion nhw, gan rannu syniadau â’r garfan newydd i’w rhoi ar waith wrth iddyn nhw fynd ati i ddatblygu eu prosiectau eu hunain.

Bu i ddisgyblion o Ysgol Uwchradd Gatholig Crist y Gair (Y Rhyl) ysbrydoli’r llysgenhadon newydd yn arbennig gyda’u heglurhad o’u menter “Buddy Bank”. Ysgogodd y syniad y garfan newydd i ystyried sut y gallan nhw helpu disgyblion yn eu hysgolion eu hunain deimlo fel eu bod nhw’n perthyn, a sut y gall creu’r ymdeimlad hwnnw o berthyn ffurfio rhan o’u gwaith gwrth-hiliaeth ehangach.

Cafodd y staff arwain hefyd gyfle i glywed gan Abi Boniface, aelod o staff arweiniol yn Ysgol Uwchradd Elfed yn Sir y Fflint, a fu’n myfyrio ar ei phrofiad hi o gefnogi grŵp Lleisiau Er Mwyn Newid Ysgol Elfed dros y blynyddoedd diwethaf. Siaradodd Abi yn agored am yr heriau mae hi wedi’u hwynebu, yr agweddau sydd wedi’i synnu yn ystod y gwaith a’r hyn y byddai’n hoff o fod wedi gwybod ymlaen llaw pan aeth ati i arwain y grŵp. Bu i’w myfyrdodau gynnig cipolwg gwerthfawr i’r staff arwain newydd o’r gwaith sydd ynghlwm ag arwain grŵp Arweinwyr Heddiw, ynghyd â syniadau ymarferol i’w defnyddio yn eu hysgolion eu hunain.

Drwy gydol y lansiad, bu i’r llysgenhadon newydd gymryd rhan mewn gweithgareddau i feithrin eu dealltwriaeth o hiliaeth a gwrth-hiliaeth, ystyried eu rôl fel arweinwyr ifanc a dechrau meddwl am yr hyn y maen nhw’n awyddus i’w gyflawni drwy eu grwpiau Arweinwyr Heddiw.

Y cam nesaf yw i’r llysgenhadon rannu eu syniadau yn eu hysgolion. Dros y flwyddyn nesaf, byddan nhw’n cydweithio i ymchwilio hiliaeth a gwrth-hiliaeth, adnabod materion sydd o bwys i’w cymunedau ysgol a datblygu gweithgareddau a chamau gweithredu i herio hiliaeth a hybu gwrth-hiliaeth.

Bydd Dangos y Cerdyn Coch i Hiliaeth yn parhau i gefnogi’r grwpiau drwy gydol y rhaglen, gan gynnig cyfleoedd i lysgenhadon a staff arwain gysylltu, rhannu syniadau a dysgu gan ei gilydd.

Rydym yn edrych ymlaen at gefnogi’r garfan newydd hon wrth iddyn nhw roi eu syniadau ar waith ac arwain gwaith gwrth-hiliaeth yn eu hysgolion.