Arweinwyr Heddiw 2025–26: Datblygu Arweinwyr Gwrth-hiliaeth Ifanc Ledled Cymru
Arweinwyr Heddiw 2025–26: Datblygu Arweinwyr Gwrth-hiliaeth Ifanc Ledled Cymru
Cefnogodd prosiect ysgolion uwchradd Arweinwyr Heddiw 2025–26 bobl ifanc mewn 10 ysgol ledled Gogledd Cymru a 6 ysgol yng Nghasnewydd i ddysgu am ac ymwneud â hiliaeth yng nghymunedau eu hysgolion a mynd ati i weithredu’n ymarferol i greu newid cadarnhaol. Ariannwyd y rhaglen drwy bartneriaid Ysgolion Iach a Chydlyniant Cymunedol yng Ngogledd Cymru a GEMS yng Nghasnewydd ac mae’n cynnig yr wybodaeth, yr hyder a’r cymorth i ddisgyblion weithredu fel llysgenhadon gwrth-hiliaeth yn eu hysgolion.
Drwy gydol y flwyddyn, aeth grwpiau disgyblion ati i fwrw golwg ar sut roedd hiliaeth yn ymddangos yn eu safleoedd nhw, nodi’r meysydd ar gyfer newid a datblygu camau gweithredu i fynd i’r afael â nhw. Mae’r rhaglen hwn yn sicrhau bod y bobl ifanc yn ganolog i’r gwaith hwn, gyda staff arweiniol yn cynnig cymorth wrth i ddisgyblion ddatblygu a rhoi eu syniadau eu hunain ar waith.
Hybu hyder a chynaliadwyedd
Dangosodd yr adborth a dderbyniwyd gan yr ysgolion fu’n cymryd rhan eleni, bod hyder y disgyblion wedi’i hybu i gynnal sgyrsiau parchus am hiliaeth, ynghyd â chymorth cadarn gan staff arweiniol tuag at syniadau eu disgyblion. At hyn, bu i’r rhaglen helpu grwpiau i hybu’r hyder a’r sgiliau i ysgwyddo mwy o berchnogaeth am eu gwaith gwrth-hiliaeth. Heb os, mae hyn yn adlewyrchu un o amcanion craidd Arweinwyr Heddiw: nid yn unig i gyflwyno rhaglen i bobl ifanc ond i helpu ysgolion ddatblygu grwpiau a dulliau o dan arweiniad disgyblion a all barhau y tu hwnt i flwyddyn gweithredu’r prosiect.
Arwain newid yn eu hysgolion
Mae grwpiau eleni wedi ymgymryd ag ystod eang o ddulliau er mwyn rhoi eu dysgu ar waith. Ymhlith y gweithgareddau roedd codi ymwybyddiaeth o hiliaeth a gwahaniaethu, cyfrannu tuag at ymgyrchoedd gwrth-hiliaeth, adolygu prosesau ac adnoddau ysgolion, a datblygu dulliau ymarferol i wella adrodd am ac ymateb i ddigwyddiadau hiliol.
Datblygu rhwydwaith
Un o gryfderau allweddol Arweinwyr Heddiw yw’r cyfle i ysgolion ddysgu gan ei gilydd. Aeth staff arweiniol a disgyblion sy’n llysgenhadon rhagddi i rannu syniadau, dulliau a heriau ar y cyd, er mwyn meithrin rhwydwaith mwy eang o bobl sy’n ymroi i greu cymunedau ysgol wrth-hiliol a mwy cynhwysol.
Bydd yr holl grwpiau oedd ynghlwm eleni yn parhau â’u gwaith, gan ychwanegu at yr wybodaeth, yr hyder a’r perthnasoedd a ddatblygwyd drwy gydol y rhaglen. Wrth i’r prosiect barhau i ddatblygu ar hyd a lled Cymru, mae yna gyfleoedd cynyddol i ysgolion a phobl ifanc gysylltu, rhannu dysgu a chryfhau eu hymagweddau tuag at wrth-hiliaeth.
Bwrw golwg tua’r dyfodol
Byddwn yn ategu’r llwyddiant presennol hwn y flwyddyn nesaf, gyda grwpiau presennol yn parhau i ddatblygu eu gwaith ac ysgolion newydd yn ymuno gydag Arweinwyr Heddiw. Bydd y rhaglen yn parhau i ddatblygu ei waith yng Nghasnewydd, gan gefnogi carfan newydd o ysgolion wrth iddyn nhw sefydlu a datblygu eu grwpiau llysgenhadon gwrth-hiliaeth.
Yn wir, mae Arweinwyr Heddiw yn dangos gwerth cynnig yr wybodaeth, y gofod a’r cymorth i bobl ifanc nodi’r materion sydd o bwys iddyn nhw ac arwain newidiadau ar eu liwt eu hunain. Wrth i’r rhaglen fynd o nerth i nerth, mae’r bobl ifanc hyn yn helpu i feithrin rhwydweithiau gwrth-hiliaeth parhaol yn eu hysgolion a thu hwnt.
Adroddiad Arweinwyr Heddiw (Cymraeg)